ХОНКОНГ. /NHK/. Манай Засгийн газар цар тахлын улмаас тогтоосон хязгаарлалтын арга хэмжээнүүдээ сулруулж байгаатай холбогдуулан тавдугаар сарын сүүлээс сургуулиудыг аажмаар нээхээр төлөвлөж байна гэж Хонконгийн засаг захиргааны тэргүүн Кэрри Лам мягмар гарагт мэдэгджээ.
Засгийн газар нэгдүгээр сарын сүүлээс хаагдсан сургуулиудыг тавдугаар сарын 27-ноос үе шаттайгаар нээхээр төлөвлөж байгаа ажээ. Мөн бялдаржуулах төв, кинотеатрыг баасан гаргаас нээхийн зэрэгцээ дөрвөөс олон хүн нэг дор цуглахыг хориглосон шийдвэрээ сулруулан найм болгох ажээ.
Халдварын 1041 тохиолдол бүртгэгдсэн Хонконгт дөрөвдүгээр сарын 20-ноос хойш дотоодод халдварласан шинэ тохиолдол бүртгэгдээгүй боловч Засгийн газар халдвар авахаас урьдчилан сэргийлэх арга хэмжээнүүдийг үргэлжлүүлэн мөрдөхийг уриалсаар байгаа юм.
Мөн эрх баригчид дотоодын судалгааны хүрээлэнд хийсэн, дахин ашиглах боломжтой амны хаалтыг оршин суугчдадаа тараахаар төлөвлөж байна. Уг амны хаалтын шүүлтүүрт зэс агуулагдах бөгөөд вирус металл дээр бага хугацаанд амьдрах чадвартай болохыг нэгэн судалгаагаар тогтоожээ. Амны хаалтыг энэ сарын эцсээс насанд хүрэгчдэд нэгийг, хүүхдүүдэд хоёрыг тараана. Түүнчлэн ийм амны хаалтыг дэлгүүрүүдээс худалдан авах боломжтой болжээ.
